أنا عاشق
وعشقي ضل تكعيبه
رماها الشوق على سطوحك
وعشقك صحى احساسي
وروحي لمستها بروحك
أنا عاشق
وعشقي غنوة الأحباب في ودن الريح
وطول ليلي أأقول اسمك
كما المتصوف الملهوف على التسبيح
أنا مفتاحك الأوحد
أنا اللي فتحت شباكك
بأول حرف من غنوه كتبها النبض والشريان
أنا اللي بقيت كما ضلك في كل مكان
بحس بنفس احساسك
ودقة قلبك الدافي
تاخدني لجنة الوجدان
وبحضن في البعاد ريحتك
وبعرف شكل تسريحتك
ولون لبسك
وايه بيدور في تفكيرك
أنا اللي بنيتلك الضلمه بيوت من نور
أنا كونك
وضلعي سر تكوينك
وانا اللي بقيت ف أحضانك .. كما العصفور
أنا اللي عشقي حدوته
في قلب كتاب من الأساطير
