مركب قديم

لاني واخد ع الجراح


لاني عمري فيها راح


ما بقتش أحزن لما أحزن


ما بقتش أقول بكره أحسن


وبقيت كما مركب قديم 


                            ماشي وشيلاه الرياح




                                                    شعر/ أيمن سراج الدين

يعني ايه

يعني ايه كلمة بحبك 

يعني ايه كلمة وداع

يعني زرعه جوه قلبك 

تطرح الشوق والضياع

يعني ايه كلمة نسيتك

يعني أصعب م المحال 

كنتي حلم لكل عاشق 

كنتي أبعد م الخيال

يعني ايه الجنه تفتح

في الحياه أبوابها لينا

واما نجري عليها تقفل

حلمها قدام عنينا

يعني ايه ..  ألف حاجه 

                            ميته دلوقتي فينا

                                    شعر / أيمن سراج الدين