بلاش يامّه الدموع ديّه
بلاش لبس البكا تاني
دا طول ما ف عيني لسه النور
وشايف شمس أوطاني
حصاني ان يوم وقع بيّه يقوم تاني
وعارف اني جرحي كبير
ونازل مني دم كتير
وعارف اني جسمي نحيل
وصوتي هزيل
لكن ضعفي اللي قوّاني
وخلاني
آطييييير كالريح مع حصاني
و زي الشمس ما غابت
ورجعت أزهى م الأول
ح اعود تاني
وباصه م البلكونه وم الشباك
وفكراني بموت ياامّه
أنا مش سهل اني اموت
أنا طالع ومش نازل
وعمري ف يوم ما ح تخازل
وعمري ف يوم ما ح تنازل
وعمري ما ابيع ولا سنتي ف أراضيكي
دا انا اسمي ارتبط بيكي
وانا المفتون بحبك انتي يا ناعسه
وانا اللي مهما آجي واروح بعود وارسى
على كفوفك
كما العصفور يغنيلك
وينشد تاني مواويلك
أنا مش سهل آموت ياامّه
دا كل ما دمي يتصفّى
بزيد خفّه
وبعلى فوق سطوح الكون
ملا يكه كتيره في الزفّه
بتعلني عريس ليكي
أنا اللي داستني مصفحة اللي باعوكي
وكسروا ضلوعي
وما قدروش يهزوني
ولا مسحوا ابتسامتي الصافيه من وشي
ماانا شايفك ساعتها عروسه ومحروسه
بكل الناس اللي حبّوكي
وعاشوا بياكلوا من طينك
وناموا بيحلموا بيكي
وعشقوا تراب حواريكي
أ نا مش سهل آموت ياامّه
بلا ياامّه الدموع ديّه
بلاش لبس البكا تاني
حصاني ان يوم وقع بيه يقوم
يقوم تاني *
شعر/ أيمن سراج الدين
ليست هناك تعليقات:
إرسال تعليق